Extremeñas by José María Gabriel y Galán

autor:José María Gabriel y Galán [Gabriel y Galán, José María]
La lengua: spa
Format: epub
editor: Oregan Publishing

Bálsamo Casero

Estamos perdíos,

no hay que dali güeltas,

que ya estoy mu jarto

de jechal la cuenta,

y ca ves que güelvo

se me poni dolol de cabeza.

—Quico, no te agines.

—Paecis boba, Cleta ;

quedrás que me esponji,

u que baile, u que jaga fachenda ;

mentris que la genti

mos jaci esta cuenta :

'Dies al escribano,

dieciséis al tío Lucio Candela,

nuevi a la comadri

y ocho a tía Endelenceia,

sin contal los caíos de hogaño,

que entri to, pues, se arrima a sesenta…

Y no miento al méico

ni al jerrero, que ya se mos quejan ;

ni te meto la renta de hogaño,

ni el trimestri, que ya se mos llega,

que solo de costas

un duru te cuesta.

¡Estamos perdíos…

no hay que dali güeltas!

U se vendi el cachujo de casa,

y en cueros mos quean…,

¡u me ajorco y me ajorro de andalmi

jechando más cuentas!

—¡Vamos, no esvaríes,

que ni en groma, ni en groma siquiera

debin de mintalsi

brutás como esa!

Y más que las trampas

tampoco te aprietan

pa que asín te agines,

pa que asín de ajogao te veas.

Verdá que se debin

toas esas gabelas ;

pero, mira, tenemos posibles

pa pagal sin vendel la jacienda.

Treinta duros quiciás la potranca

te vali en la feria ;

tres guarrapos, a cinco, son quinci,

y preñá la lichona mos quea ;

entri yo y la muchacha otros cinco

mos ganamos jilando dos telas,

que quiciás este ivierno poamos

jilal dos y media ;

con los burros, a días perdíos,

tú te sacas tres durus de güebras,

y las miajas de rastras que faltan

y el réito que sea,

lo poemos matal con jornalis

de la aceitunera,

de los cavucheos

y de la lavería.

Si asperan un año,

no se quea a debel una perra.

Y en cuenta no meto

lo primero que para la yegua,

que está senteciao

pa si al cabo se casa Teresa,

que hay que jateala

bien de ropa nueva.

¿No ves cómo Sali

pa salil de deudas

sin mental la casa

ni decilmos brutás como aquella?

—¡Hora! Ya lo veo ;

no sé jechal cuentas,

porque no pienso en esos rinconis

que a ti te se acuerdan.

Lo que jago es ponelme möorro

cuando doy en quereli dal güeltas ;

y con estas que tú me has jechao,

me has barrío el dolol de cabeza…

descargar

Descargo de responsabilidad:
Este sitio no almacena ningún archivo en su servidor. Solo indexamos y enlazamos.                                                  Contenido proporcionado por otros sitios. Póngase en contacto con los proveedores de contenido para eliminar el contenido de derechos de autor, si corresponde, y envíenos un correo electrónico. Inmediatamente eliminaremos los enlaces o contenidos relevantes.